Kvörðun: Notkun fylgnistuðlafylkis

Ef hinar mismunandi mælingar eru t.d. svör við krossaprófum eða lengdarmælingar með sömu mælieiningu, þá er ljóst að eðlilegt er að vega mælingarnar saman. Í sumum tilvikum eru mælieiningarnar hins vegar mjög mismunandi og þá þarf að endurkvarða mælingarnar og gefa þeim á einhvern hátt sömu einingar. Þetta má gera með því að draga frá þeim meðaltal og deila með staðalfráviki:

$$y_{ij} = \frac{ x_{ij}- x_{.j}}{s_{j}}.$$ (11)

Þá kemur í ljós, að samdreifni hinna nýju mælinga er einfaldlega fylgnin milli upphaflegu mælinganna. Því er nóg að nota fylgnistuðlafylkið $\mathbf{R}$ í stað samdreifnifylkisins $\mathbf{S}$ í stað þess að smíða nýjar breytur.