Fimm árstíðir

Nýr lagabálkur eftir Þorvald Gylfason við ljóð eftir Snorra Hjartarson

Fimm árstíðir er heitið á sönglagaflokki eftir Þorvald Gylfason prófessor við kvæði eftir Snorra Hjartarson. Kvæðin eru Haustið er komið, Ísabrot, Vor og Sumarkvöld, einu nafni Fjórar árstíðir, og loks Í Úlfdölum, fimmta árstíðin. Lögin eru samin fyrir sópran, tenór og píanó. Hallveig Rúnarsdóttir sópran, Elmar Gilbertsson tenór og Snorri Sigfús Birgisson píanó frumfluttu ljóðaflokkinn í Hannesarholti í Reykjavík 11. marz 2017. Höfundur laganna las kvæðin fyrir áheyrendur áður en þau voru sungin og leikin. Dagskráin tók um 30 mínútur og var tekin upp handa sjónvarpi. 
Snorri Hjartarson (1906-1986) er eitt helzta ljóðskáld Íslands á 20. öld. Hann hlaut bókmenntaverðlaun Norðurlandaráðs 1981 fyrir ljóðabókina Hauströkkrið yfir mér (1979). Meðal annarra ljóðabóka hans eru Kvæði (1944), Á Gnitaheiði (1952) og Lauf og stjörnur (1966).
Þorvaldur Gylfason prófessor hefur samið um 100 sönglög, m.a. Sautján sonnettur um heimspeki hjartans, Söngva um svífandi fugla, Sjö sálma og Sextán söngva fyrir sópran og tenór við kvæði Kristjáns Hreinssonar. Sonnettur þeirra félaga voru fluttar í Hörpu 2012 og 2013, fuglasöngvarnir í Salnum í Kópavogi 2014, sálmarnir í Langholtskirkju 2014 og í Guðríðarkirkju 2015, og frumflutningur söngvanna fyrir sópran og tenór fór fram í nóvember 2017.   Hallveig Rúnarsdóttir sópran hefur sungið mörg óperuhlutverk á sviði, m.a. í Íslensku óperunni, og einnig erlendis og komið fram sem einsöngvari með hljómsveitum, m.a. oft með Sinfóníuhljómsveit Íslands. Undanfarin ár hefur hún einnig lagt áherzlu á ljóðasöng og haldið tónleika með þýzkum, frönskum og norrænum sönglögum. Á geisladiskinum Í ást sólar flytur hún íslenzk sönglög ásamt Árna Heimi Ingólfssyni piánóleikara.
Elmar Gilbertsson tenór hefur sungið mörg óperuhlutverk á sviði innan lands og utan, einkum í Hollandi og einnig í Frakklandi, Þýzkalandi og víðar. Hann hlaut Grímuverðlaunin 2014 sem söngvari ársins fyrir hlutverk Daða Halldórssonar í óperunni Ragnheiður eftir Gunnar Þórðarson í Íslensku Óperunni og aftur 2016 fyrir hlutverk Don Ottavio í Don Giovanni eftir Mozart. Hann hlaut einnig Íslensku tónlistarverðlaunin 2014 sem söngvari ársins í flokki sígildrar og samtímatónlistar. 

 

  Picture Snorri Sigfús Birgisson píanóleikari stendur í fremstu röð íslenzkra píanóleikara og er jafnframt mikilvirkt tónskáld. Eftir hann liggur fjöldi tónverka: einleiksverk, kammertónlist, raftónlist, kórtónlist, sinfónísk verk og sönglög. Tónlist hans er að finna á fjölmörgum geisladiskum og hljómplötum. Hann gekk frá útsetningunni að Í Úlfdölum í hendur söngvaranna tveggja.    
   

Til baka

In English