Sautján sonnettur um heimspeki hjartans

Lagabálkur eftir Þorvald Gylfason við ljóð eftir Kristján Hreinsson

Sautján sonnettur um heimspeki hjartans nefnast sönglög eftir Þorvald Gylfason prófessor við ljóð eftir Kristján Hreinsson skáld og heimspeking. Lögin eru samin fyrir tenór, barítón, píanó, selló, saxófón, slagverk og strengi og hefur Þórir Baldursson tónskáld útsett þau. Ljóðin og lögin eru óður til heimspekinnar og bera staðarlit af slóðum heimspekinganna sem þau fjalla um. Bergþór Pálsson baritón, Garðar Cortes tenór, Selma Guðmundsdóttir píanó, Júlía Mogensen selló, Jón Elvar Hafsteinsson gítar, Pétur Grétarsson slagverk og Sigurður Flosason saxófónn fluttu allar sonnetturnar sautján í Hörpu á Menningarnótt 24. ágúst 2013. Skáldið flutti stuttar skýringar á undan hverju lagi og ljóði sem var varpað á vegg á bak við sviðið. Dagskráin tók tæpa klukkustund í flutningi. Kvikmyndafélagið Í einni sæng tók konsertinn upp fyrir sjónvarp. Myndin bíður sýningar. Sjá kvæðin hér.
Kristján HreinssonKristján Hreinsson er skáld, tónskáld, söngvari og heimspekingur. Eftir hann liggja bráðum 40 bækur auk fjölda hljómdiska.
Þorvaldur Gylfason hefur samið um 100 sönglög, m.a. Söngva um svífandi fugla og Sjö sálma við kvæði Kristjáns Hreinssonar og Fimm árstíðir við kvæði Snorra Hjartarsonar. Sonnettur þeirra félaga voru fluttar í Hörpu 2012 og 2013.    Garðar Cortes hefur sungið mörg helztu tenórhlutverk óperubókmenntanna heima og erlendis. Hann stofnaði Íslensku óperuna og stýrði henni um árabil. Hann stofnaði einnig Söngskólann í Reykjavík og hefur stjórnað honum frá upphafi. Hann hefur sungið inn á marga hljómdiska, einnig dægurlög. Bergþór Pálsson hefur sungið ýmist óperuhlutverk eða ljóð. Hann söng titilhlutverkin í Evgení Ónegin eftir Tsjækovskí og í Don Giovanni eftir Mozart í Íslensku óperunni auk fjölda annarra hlutverka og hljóðritana.

EFNISSKRÁ

1.   Leibnizsonnettan

2.   Schopenhauersonnettan

3.   Gandísonnettan

4.   Ástardraumasonnettan

5.   Lao-Tsesonnettan

6.   largróskusonnettan

7.   Cartesíusarsonnettan

8.   Unaðsreitasonnettan

9.   Stjórnarskrársonnettan

10. Lótusblómasonnettan

11. Marxsonnettan

12. Lífsbókarsonnettan

13. Sókratesarsonnettan

14. Mandelasonnettan

15. Kirkjugarðssonnettan

16. Kastrósonnettan

17. Nietzschesonnettan

  SelmaSelma Guðmundsdóttir píanóleikari hefur leikið inn á marga hljómdiska ein og með öðrum, þar á meðal Ljúflingslög ásamt Sigrúnu Eðvaldsdóttur fiðluleikara. Júlía Mogensen er sellóleikari í Sinfóníuhljómsveit Íslands.
Þórir Baldursson tónskáld hefur verið í hópi ástsælustu músíkanta landsins í meira en hálfa öld. Hann hefur m.a. útsett tónlist fyrir Elton John.
Vignir Jóhannsson myndlistarmaður gerði bakgrunna glærusýningarinnar sem fylgir söngnum og hljóðfæraleiknum á tónleikunum.

KIRKJUGARÐSSONNETTAN

Hann Sören Kierkegaard var maður merkur
og mögnuð sál í amstri sérhvers dags
– í heimspekinni trúin var til taks –
og töframáttur skáldskaparins sterkur.

Hann stundaði þann takt í áratugi
að tefja vel við sína miklu list,
hann tilbað Guð og átti orð við Krist
og allt var gert með miklu hugarflugi.

Þá skrifaði hann rit um Ugg og ótta,
við Endurtekningu hann fékk að kjást
hann þráði von og heimsins heitu ást
með hugsun sinni var hann þó á flótta.

Hann sá með eymd í harmi hefðar sinnar
hvert hjónaband sem grafreit ástarinnar.

Leibnizsonnettan var síðasta lag fyrir fréttir í RÚV 6. desember 2014.

Til baka

In English