Guðrún Vilmundardóttir fæddist í Kaupmannahöfn 7. desember 1918, dóttir hjónanna Vilmundar Jónssonar landlæknis (1889-1972) og Kristínar Ólafsdóttur læknis (1889-1971). Systkini Guðrúnar voru Ólöf tannsmiður (1920-1998), gift Þorsteini Ólafssyni tannlækni, og Þórhallur (f. 1924), kvæntur Ragnheiði Torfadóttur fyrrum rektor Menntaskólans í Reykjavík. Guðrún lauk stúdentsprófi 1938, var blaðamaður um tíma, giftist 1939 Gylfa Þ. Gíslasyni (1917-2004) prófessor og ráðherra og stofnaði með honum heimili í Reykjavík, þar sem þau bjuggu fyrst í Garðastræti 13a (1939-1948) og síðan að Aragötu 11. Foreldrar Gylfa voru Þorsteinn Gíslason skáld og ritstjóri og Þórunn Pálsdóttir húsmóðir. Synir Guðrúnar og Gylfa voru Þorsteinn Gylfason (1942-2005) prófessor, Vilmundur Gylfason (1948-1983) menntaskólakennari og ráðherra og Þorvaldur Gylfason (f. 1951) prófessor. Guðrún þýddi æviminningar Trygve Brattelie, forsætisráðherra Noregs (Nótt í Niflungaheimi, 1983). Hún andaðist að Droplaugarstöðum í Reykjavík 15. ágúst 2010.

 


Til baka